記得上年4月有Fans分享左一間係首爾新村新開既公寓式酒店Shinchon Ever8 Services Residence，從個時開始自己經常都會向身邊朋友推介呢間酒店！
HotelClub：http://www.hotelclub.com
酒店格價：http://www.hotelscombined.hk/Hotel/Ever8_Serviced_Residence.htm
Shinchon Ever8 Services Residence係一間公寓式酒店，2014年3月先開，揀得佢就係貪佢有家既感覺，酒店外觀唔太似平時住開既酒店，似普通住宅多些，夜晚返酒店好有返屋企既感覺！
酒店大門係對住內街，唔係太顯眼
入到酒店大堂，佈局比較簡約，白色為主既設計，可能過左check in/out既繁忙時間，大堂格外安靜同舒服
check in完之後可以係旁邊搭電梯去自己間房，電梯口既有保安，又有信箱，加埋電梯大堂既裝橫，的確好似住左係民居咁，我就係想要呢種家的感覺！
上到樓層，走廊無特別既裝飾擺設
入到房間，似一般韓式居室，記住要除鞋換左拖鞋先入屋
房間好寬敞下，設計比較簡約，採用白色同灰色為主色再配合一些原木家具，比人感覺好舒服
張床都幾大，左右兩邊仲有唔少空間，加多張床都仲有位淨！酒店有提供3人房，適合一家大細入住
見到呢幾樣高科技野，令我諗起來自星星的你都教授係個防盜度睇住飲醉左既千頌伊個一幕
右下方那個係冷暖氣同熱水開關，記住要開左佢先有熱水沖涼！
因為本身只有韓文，酒店好體貼咁係旁邊加返中英文說明。check in時，前檯都有提一下
一般公寓式酒店如果房間夠大，都會擺放梳化或者茶几去營造家既感覺。Ever8都唔例外，放左1張檯同2張櫈係窗旁，可以當做迷你飯檯。床尾就係梳妝檯同電視機，大家可以訓係床到追劇！
梳妝檯上有埋化妝鏡
廚房係公寓式酒店不可或缺既一部分，Ever8有個都算頗大既Pantry！煮公仔麵無難度！
另外房內仲有洗衣機，洗衫可以自己搞掂
大雪櫃，人咁高既雪櫃，不過入面其實只有2支水
電磁爐，微波爐，熱水壺一應俱全，另有仲有一個去塵碌碌
廚房有埋抽油煙機，唔駛驚煮完野成間房都有味道
廚具刀具全部齊備，唔係煮一些極複雜菜式既話應該都應付到，同女朋友去既話，可以趁機俾佢練習一下
洗手間就相對細一些，都係簡約風格，風筒固定左係牆上面，吹頭一定要係廁所隔離吹啦
櫃上面有洗頭水、沖涼液同毛巾
沖涼既地方同洗手盤估唔到係二合為一，設計幾特別下
打開既時候就係洗手盤
合返埋就係淋浴間
講返酒店設施，公寓式酒店係呢方面一定比唔上傳統酒店，最基本既business corner就係大堂
另外佢有自己既餐廳同健身房，我去既時間健身房正正裝修緊，睇唔到入面係點，地方唔係太大
係電梯大堂向前少少行會有一間24小時便利店
仲有一間小小既cafe，cafe入面有少少3D Art做裝飾，幾得意！
酒店正門外面露天位置都有cafe既3D Art
Cafe同美甲店中間有一個門口，由呢度門出去會近地鐵站一些
Ever8係位於新村同梨大兩個站中間，梨大就會稍微近一些，最近既出口係呢個1號出口
出左去直行，一直行到呢個有電話亭既馬路，過左馬路右邊第二棟就係Ever8
不過如果你入由機場拖住行李出發既話，建議去返6號出口搭升降機
出左升降機直行就可以向右過馬路，馬路另一邊係Watsons，不過呢條馬路都真係幾多車，要耐心等待！
附近都有機場巴士站，大概行7分鐘左右
往地鐵1號出口方向行，過左1號出口再繼續直行就係4號出口，再向前少少，就會見到左邊可以過馬路，機場巴士站就係路中間
可以坐6002，大概1個鐘就可以到機場
酒店：Shinchon Ever8 Serviced Residence (新村愛威爾8服務公寓酒店)
地址：120-809서대문구 신촌역로 7
