講起廉航，相信Fans們對AirAsia都唔會陌生，AirAsia已經連續7年蟬聯 Skytrax 「 世界最佳低成本航空公司」 。今次受到AirAsia邀請參與曼谷4日3夜 FAM Trip，第一篇先寫寫AirAsia香港飛曼谷既飛行體驗，等大家感受一下吧
坐AirAsia由香港出發既話，主要有呢六條直航航線：吉隆坡、亞庇(沙巴)、曼谷、布吉、清邁同馬尼拉；曼谷係飛廊曼機場(DMK)，即舊機場；每日有三班航班，一班早機、兩班晚機
除左香港飛曼谷每日有三班機之外，由2015年7月起，澳門(MFM)飛往曼谷廊曼(DMK)機場每日會增至4班航班
AirAsia係泰國有好多航線，飛到曼谷後，仲可以坐AirAsia飛去19個
今次飛曼谷係搭星期一既早機 (FD 509 10:45-12:30)
AirAsia既check-in counter係香港二號客運大樓 (Terminal 2) P行段
Check-in counter地勤又幾快手，排住隊，禁幾下電話已經寄得行李
同普遍廉航一樣，行李寄艙要另外俾錢，一早買定會平過去到機場先買架！寄艙行李係以重量計算，不限件數，相同訂位編號既同行乘客可以share寄艙行李既重量，所以可以夾埋同行一齊買
今次登機閘口係20號，唔使行咁遠，廉航登機閘口其實都唔一定泊到好遠
好快已經見到架機，AirAsia目標係做到飛機抵達 25 分鐘後將飛機推回原位準備下一航班
係閘口等左一陣可以開始登機
AirAsia主要以Airbus A320執飛，座位係3-3，機上座位有顏色之分：紅色既係特選座位，黑色既係普通座位
如果想自己揀位，就要俾錢，唔同位要唔同價錢，最貴既係第一、十二同十四排，因為可以優先登機及享受額外腿部伸展空間
座位空間唔算好多，不過飛幾個鐘問題唔大，但黑色座位既客人係唔可以見有空位就坐去紅色座位，會被趕架，哈！
機上就無咩娛樂設備，有機上雜誌可以睇下，唔少得仲有機上免稅商品出售
機上餐飲方面，都係要收費，但價錢唔貴，大家可以係出發前訂定就唔怕上到機冇得食，飛曼谷既話可以揀以下既餐，選擇都幾多 (唔同航線有唔同款色)
http://www.airasia.com/hk/zh/inflight-comforts/fd-in-flight-menu.page
呢次試食左兩款餐，每一款都會連一小杯水
左邊既係泰式炒金邊粉、右邊既係ML Noi羅勒炸雞飯 (預訂價各HK$32)，兩個都好惹味，食得辣既我都覺幾辣下！唔食辣既Fans點餐要留意下
機上都有飲品發售，食完辣野岩晒，汽水盛惠THB 60 (約HK$14)
細心d睇你會發現機上唔同位置都會賣下廣告
係晴朗既一天出發
飛左大概2小時45分鐘就到達曼谷廊曼(DMK)機場，比起蘇凡納布(BKK)機場，即新曼谷機場果邊，呢度細得多，幾條行李帶一眼望晒
廊曼(DMK)機場雖然細，不過變相冇咁擠擁，機場入面兌錢，出電話卡亦都非常方便
至於回程方面，成個流程都好暢順
唔好以為係收據，呢張係回程既登機證！要好小心收好，如果唔係當垃圾咁掉左唔知去邊就麻煩喇
舊機場唔係好大，有免稅店、BOOTS藥妝店、手信鋪頭等等，行左一陣就到左登機閘口
要坐接駁巴士登機
呢次再試另外兩款餐，有秦叔叔雞飯 (預訂價HK$32)同埋芒果糯米飯(預訂價HK$27)
雖然我唔知邊個係秦叔叔，但呢個雞飯又幾好食，雞肉烤過之後不損嫩滑，兼幾入味，呢個飯唔辣架
估唔到係飛機上面可以食到芒果糯米飯！
望多兩望，覺得食完秦叔叔既雞飯有d飽，將芒果糯米飯放埋左一邊，過左陣空姐走過黎，主動放低左個膠袋俾我打包，我仲猶疑左一陣究竟係咪俾我既，估唔到廉航既空姐都咁有服務水準
坐得廉航其實都唔會有太高要求，行李收費、餐飲收費呢d全部都預左；機上面座位窄一些、無娛樂設施，機程唔太長既話，問題其實不大
今次坐AirAsia既體驗都唔錯，Check in幾快、航班準時、飛機餐雖然收費，但價錢唔貴而且款式多，味道亦唔錯，特色餐食好似芒果糯米飯等都顯得有誠意、空姐空少服務貼心，呢點真係最驚喜！唔怪得之AirAsia一直都拎到唔少獎項，希望AirAsia可以繼續保持服務水準，Fans們就可以有多d圓滿既飛行體驗喇！
