上次好似好多人話想睇多d，太長怕你地唔睇嘛～～好啦咁今次就寫篇長既！拿同我睇曬佢呀拿！
＜前傳：[小言在廣島] HK Express 廣島新航線率先試！ ＞
即係咁，有時要你諗個地方，近近地又適合一家大細去玩既，你都咪話唔難諗！有D地方小朋友覺得悶；有D又唔岩帶父母喎～
今次去完廣島發現…咦！好似老中青幼都岩去喎，就算唔識揸車冇得自駕一樣掂！
【咩季節最岩去?】
岩玩季節：四季佳宜
通常大家係plan行程既時候，都一定會考慮埋岩唔岩季節！日本正就正在四季分明，唔同季節有唔同面貌，各有各靚。
唔好以為廣島淨係岩秋天去睇紅葉喎，其實一年四季都有好多唔同節慶咖！
春夏：鮮花節(5月) 、三月Yasa節(8月第2個星期五、六及日)、宮島水中焰火大會(8月中) 等等
秋冬：酒祭(10月第2個星期六日)、尾道Betcha祭(11月1-3日)、廣島夢幻彩燈節(11月17日-2016年1月3日)、宮島牡蠣節(2月第2個星期六日) 等等
＿＿＿＿＿＿＿＿＿＿＿＿＿＿＿＿＿＿＿
簡單講講我既行程先：
Day 1 : 香港 →廣島 (UO800)
Day 2: 早餐 →千光寺 →午餐 →大久野島 → 晚餐
Day 3: 早餐 → 宮島(午餐島上解決) → 晚餐
Day 4: 早餐 →三滝寺 → 午餐 → 機場→香港(UO801)
呢篇文就先逐一介紹下D景點，下一篇再講食宿！
【千光寺】
景點賣點：#睇貓 #祈福 #覽車
必去指數：★★★★☆
必影指數：★★★★☆
前往方法：
廣島站(JR東海道/山陽新幹線)→福山站(JR山陽本線電車)→尾道站。由尾道站行大概15分鐘左右就到啦！全程大約要 1個鐘左右。
尾道其實好文藝小清新，幾適合影下相，連盧廣仲都係度拍MV！
上千光寺，可以揀行或者搭纜車。纜車每15分鐘一班，車程5分鐘。
|
票價 |
單程 | 來回 |
| 成人 | 320円 | 500円 |
| 小童 | 160円 |
250円 |
建議大家纜車上山，再行落黎。如果大家係貓奴，就要行下貓の細道啦！我地由於時間關係，只能夠纜車上落，同D貓貓緣慳一面添～唉～～
*記得係售票處拎張地圖先，如果唔係呢度錯綜複雜，都幾易迷路。
一落纜車就會有貓車長同你say hi！
360度觀景台
戀人の聖地，又一個情侶check point～～
見到唔少人就咁樣爬上去，當地人視之為一種修行方式，修行要俾奉納金100円。
【大久野島（兔島）】
景點賣點：#餵兔仔 #行山 #歷史(毒氣資料館)
必去指數：★★★★★
必影指數：★★★★☆
前往方法：
廣島站(JR山陽新幹線)→三原站(轉乘JR西日本吳線)→忠海站 (*吳線班次較疏，記得先影抵時刻表，以便預時間)，出左JR忠海站後右轉直行7分鐘到就到忠海港。係忠海港搭船12分鐘左右就到大久野島咖啦！
| 票價 | 單程 | 來回 |
| 成人 | 310円 | 620円 |
| 小童 | 160円 | 320円 |
係以前戰爭時期，兔島係用黎製造化學武器既地點，所以又稱為毒氣島。後來1934年獲指定為瀨戶內海國立公園，係國民休暇村同大久野島毒氣資料館啟用之後，係島外一間小學引入左8隻野生兔仔黎兔島。由於天然環境良好，呢度既兔仔繁殖得好快，變左島上特色。而家島上約住左300幾隻兔仔(ok啦都冇香港咁逼)！
亮點：見唔見到有個得意妹？！Cute 爆！
上船前可以買定兔糧…但！！！重點黎啦！！！！佢地係唔「吼」兔糧咖！！！！！如果真係想餵兔仔，就買新鮮紅蘿蔔或者生菜啦！真係要買兔糧的話，幾個人share一包好啦，如果唔係真係派唔曬！！！
拿上船就呢度啦！另外，唔知點解，日本隨手一影，都好小清新……
唔知而家仲有幾多人有寫遊記既習慣呢？小言就成日一個trip寫到一半自動fade out左(笑)，後來甚至懶到求其將D飛尾貼上本簿度就算！哈哈！如果你本遊記係隨身攜帶既話，不妨係度蓋返個章！(我印到好fail…就唔影俾大家睇啦)
船倉有特別俾小朋友玩既地方(好貼心呀！) 又見到得意妹啦！(心心眼)(怪姐姐)
貶下眼就到啦！落左船會見到有巴士，果架係接送遊客去島上酒店既。
如果你扶老攜幼咁去旅行，大久野島啦唔使諗啦！小朋友可以同兔仔玩；老人家可以健行，坡度平緩慢慢行好舒服。
提提大家，平時蒲開碼頭果班兔仔見慣曬大場面唔係好理人咖～行入D仲有好多，佢地俾面D，見到野食會high D…hahahaha
【宮島】
景點賣點：#世界文化遺產 #祈福 #野鹿 #食蠔 #睇日落 #買手信 #寄postcard (宮島有郵局唔使周圍搵!)
必去指數：★★★★★
必影指數：★★★★★
前往方法：
1. 廣島站(JR山陽本線)→宮島口站→渡輪往宮島 (有JR pass可選，車程27分鐘)
2. 廣電2號線→宮島口→渡輪往宮島 (如果同日會去埋其他景點，可以買day pass*。搭JR快D，廣電車程大概要1個鐘，但可以玩埋其他景點)
3. 和平紀念公園(渡輪：世界遺產航路)→宮島 (呢個方法較貴，成人單程2000円/來回3600円，小童半價。較建議用上面2種方法)
| *day pass | 廣電一日乗車券 | 廣電一日乘車乘船券 |
| 票價
|
成人 600円
小童 300円 |
成人 840円
小童 420円 |
| 可選乘路線 | 廣電全線 | 廣電全線 + 宮島松大汽船 |
搭船入到宮島差唔多10分鐘到，有買JR pass 就搭返JR既渡輪(JR西日本宮島フェリー)，上船show返張pass就得，唔使另外買船飛。上船前碼頭會有塊板寫住潮汐漲退時間，大家可以留意下。
宮島都有好多D鹿仔，而且好乖~呢隻成個好奇寶寶咁哈哈！不過要留意，宮島係嚴禁餵食野鹿咖！
宮島係日本三景之一，當中最令人期待既當然係嚴島神社同海上鳥居啦！當日去到仲有幸目睹日本最傳統既結婚儀式，但基於尊重係唔可以影相咖！
潮退時係可以行出大鳥居影相咖！
黃昏既宮島非常浪漫，搞到我係咁影影影影左好多相！所以話…呢度一家大細岩；情侶又岩；三五知己都岩！
如果鍾意玩戶外運動，仲可以去試下玩水上皮艇！租艇可以係Paddle Park租，店舖位置係前空站(JR宮島口站下一個站)，行3分鐘左右就到。唔識游水都唔使怕，會提供救生衣。教練帶你划到去鳥居果邊再返返轉頭，個人覺得好好玩！(時間價錢click下圖有得睇)
特別鳴謝友情出鏡～～～
【三滝寺】
景點賣點：#行山 #睇紅葉 #祈福 #浴佛
必去指數：★★★★☆
必影指數：★★★★★
前往方法：
廣島站(JR可部線)→ 三滝站。出站後行20分鐘左右就到啦！
三滝寺相傳為原爆無名死難者既安息地。山上三條瀑布川流不息，黎到呢到既人都會用瀑布既水黎「浴佛」。
如果想係廣島行山睇紅葉，就一定要黎呢度啦！導遊話行到頂需要2鐘左右，可以飽覽廣島既城市景觀。
呢個就係前面講既「浴佛」 
日本人怕d佛像凍親，特登整d小冷帽小圍巾俾佢地保暖，真係細心～～
雖然未有好多紅葉睇，但變化緊既時節…紅黃綠都有齊，望落一樣咁靚！
【其他景點】
其實除左上面介紹既景點之外，廣島仲有好多野睇咖！不過因為時間唔多，好多都冇去到，所以冇相俾你地睇，真係唔好意思咁多位。只可以係度提供到小小資訊，希望幫到大家啦！
1. 和平紀念公園＆原子彈爆炸圓頂屋＆廣島和平記念資料館
和平記念資料館開放時間：
3-11月：上午8點半至下午6點
8月：上午8點半至下午7點
12-2月：上午8點半至下午5點
閉館：12月29日至1月1日
入門費：成人：50円，兒童(高中生以下)：30円
前往方法：
1. 自駕：從山陽道‧廣島IC出口約25分鐘
2.路面電車： JR廣島車站南口(往江波，宮島口方面)→ 原子彈爆炸圓頂屋前，車程約15分鐘。
3. 廣島巴士：JR廣島車站南口(往吉島方面)→和平記念公園，車程約20分鐘。
2.廣島城
開放時間：
3-11月：上午9點半至下午6點
12-2月：上午9點半至下午5點
閉館： 12月29日至1月2日
*或有臨時閉館日
入門費：成人：360円，兒童(高中生以下)：180円
前往方法：
1. 自駕：從山陽自動車道‧廣島IC出口約20分鐘。
2.路面電車：JR廣島車站→紙屋町東，落車行20分鐘到達。
3.紅葉谷公園
前往方法：
廣島站(JR山陽本線)宮島口站→宮島口(轉乘渡船)→宮島棧橋，落船後大概行20分鐘左右到紅葉谷公園，全程需時約1個鐘。
4.花夢之鄉 Rokuten
前往方法：
廣島站(JR芸備線)→三次站，係三次站轉的士入去(大約半個鐘車程)，全程大約需要2個鐘。
【JR Pass】
同廣島有關既JR Pass 有呢幾張：
- Sanyo-San’in Area Pass 山陽＆山陰地區鐵路周遊券
- Kansai-Hiroshima Area Pass 關西＆廣島地區鐵路周遊券
- Hiroshima-Yamaguchi Area Pass 廣島＆山口地區鐵路周遊券
大家按返自己行程揀張岩既，因為我地冇用Pass，所以大家都係click個pass 入去宮網睇睇最穩陣。
景點介紹就到呢度先，如果當中有資料錯漏，還請建議指教。
下一篇同大家介紹下廣島行既食宿，敬請繼續支持！
