最近飛台灣機票真係低處未算低，Weekend飛轉台北分分鐘抵玩過去澳門，小編最近就飛左轉台北weekend Trip。雖然大大話話台灣都去過不下10次，估唔到今次去仲有新野可以同大家介紹下：就係台北新開嘅美式露天outlet – GLORIA OUTLETS 華泰名品城！
根據官方網站嘅資料，呢個outlet係上年12月底先開幕，係台灣第一個真正美式露天outlet，環境比較接近香港人去歐美時必行果種outlet，總共會分3期，目前只開放左第一期，但已經有超過100間國際品牌進駐，大家熟悉嘅牌子如：Armani、Hugo Boss、Coach、Dunhill、Levi’s、Folli Follie、Ralph Lauren、CK、New Balance、Columbia等，類型包括時裝、運動、鞋、Luxury、嬰幼兒用品，都算齊全。（完整Shop list)
有去開台灣嘅朋友應該都知最近台北其實開左2個outlet，相比起另一個係林口嘅outlet，呢個位於桃園高鐵站嘅華泰名品城係交通同環境上會更方便，比較多歐美牌子，而另一間就多D日本牌子，感覺同香港一般Shopping較為類近，以行得舒服同方便程度嚟講，小編推薦呢間。
地址：桃園市中壢區春德路189號 （地圖）
營業時間：星期日至四10am-9pm；星期五、六及公眾假期10am-10pm
電話： ＋886 (03) 273-8666
交通：http://www.gloriaoutlets.com/zh/shopping/traffic
小編同朋友係台北車站坐高鐵出發，車程20分鐘（約HK$35)，高鐵桃園站出，7號出口對面就係，以去outlet嚟講算係方便快捷。另外outlet有接駁車去機場*，坐的士到機場就10-15分鐘車程 ( 約HK＄70)
*乘搭機場往返桃園高鐵站的接駁巴士（統聯）UBus705，可以憑當日車票或購票證明於顧客服務中心退車票 （活動有效至9月30日，詳情按此）
20分鐘車程後，由呢個出口一出對面馬路就到，步行2分鐘
之後如果台灣機場捷運開埋（聽聞係年底）就仲方便，一出捷運A18就係outlet門口
如果坐的士，就會係另一個入口（Information Center）進入。
Outlet建築分3層，1樓（即係G/F, 台灣叫1樓）主要係時尚名牌及精品，2樓生活休閒及運動類品牌較多，至於3樓就主要係餐廳。
一樓嘅店主要以比較知名嘅國際牌子為主，Armani、Ferragamo、Coach、Michael Kors、Ralph Lauren、CK、Hugo Boss、Loewe等都係呢道。另外GLORIA OUTLETS將Made for Outlet嘅意念帶入台灣，唔少店都有Outlet Exclusive嘅產品，所以店內唔會得返斷碼過季賣唔去嘅產品，而就現場所見貨量充足，款式雖然唔會係當季最新款，但都跟貼國外outlet款式，有誠意同驚喜。
*Outlet內所有貨品如果無標明，最少都有7折
款式同折扣都好吸引，而且唔少牌子都做緊3－4折特價，相信都好難全身而退…
其實小編(的荷包）對運動休閒類嘅牌子比較有興趣，Columbia、Timberland、New Balance、Nike、Levi’s…而且除了本身折扣外，唔少品牌都會針對特定商品標提供唔同折扣！好似Levis也有第二件1折起、 ourdoor 必買嘅Columbia都有見到台幣千元以下（HK$250以下）嘅鞋款！
香港基乎人人都有對既New Balance，小編發現店內款式非常多，唔少香港少見嘅顏色都有貨。
Nike鞋款嘅價錢亦非常吸引，據知經常有客人一買買幾對走，小編表明自己係Blogger想影幾張相介紹下，但職員唔比小編影價錢牌，話唔想引嚟水貨客，過嚟掃斷晒某鞋款，所以…你地自己去睇啦 XD。
而早排港人熱捧嘅UGG亦有唔少5折款，小編覺得最吸引嘅係呢類小朋友鞋款，非常可愛！而且正價時通常唔捨得買，5折咁抵就真係可以考慮下。
小編台灣朋友推薦嘅Roots，據說係台灣非常有名，入面除左衫褲鞋襪，仲有間cafe比你行到累可以坐底食少少野休息下。
美食推薦：小編每次到台北，都會去東區食一次屯京拉麵，不過最近去發覺水準有所下降。反而我竟能係 outlet內發現另一間非常值得推薦嘅拉麵店：「錦拉麵」，了解後先知台灣第一間分店，即係得呢度有得食，而且錦拉麵出名嘅原因都幾奇特，佢係日本係排除名店，要食就一定大排長龍，「連續4年排隊第一」嘅名拉麵店。 台北呢間目前有3個師傅係日本過嚟嘅，味道同日本有無咩分別小編無從比較，但真係非常好味！拉麵迷值得嚟試試。
雞玉錦拉麵 Nishiki Ramen
地址: 桃園GLORIA OUTLETS 華泰名品城4F (桃園市中壢區春德路189號，在桃園高鐵站正對面，步行一分鐘。)
另外頗為受香港朋友喜愛嘅新派台灣料理：「參和院」都會係道開分店，小編都係呢間店嘅Fans！如果開左都係一間值得一試嘅餐廳。
部分優惠簡介：
－outlet全場國際品牌最少7折、部分低至3折起 (全年有效）
－旅客可憑護照於Information Center換領優惠卷
－乘搭機場往返桃園高鐵站的接駁巴士（統聯）UBus705，可以憑當日車票或購票證明於顧客服務中心退車票 （活動有效至9月30日，詳情按此）
－以最新版本長空旅遊書（閃閃封面旅遊書）中的換領卷可以換取小禮品
－會員優惠：生日驚喜禮物／免費停車3小時／特定美食95折／會員優惠卷／不定期抽選會員免費體驗VIP Lounge
*網上免費登記成為會員按此
作為精明嘅消費者，記得先到Information Center拿左Coupon先，同埋買完野記得嚟呢道辦理退稅！只要購物滿台幣2000（約HK＄480) 就可以辦理退稅。不過要留意【*客服中心僅提供「退稅明細申請表」之登記，並非於客服中心現場辦理退稅手續。所有旅客皆必須持「退稅明細申請表」，方可至機場或港口之海關「外籍旅客退稅服務台」辦理退稅手續)。】
VIP Lounge
Outlet 一定要有嘅Locker，空間算大，放到一個29″嘅旅行箱。
如果有小朋友，有個兒童遊樂區比佢地發洩精力，呢個outlet都對family friendly嘅地方，嬰兒車租借服務及Nursing Room等設施都齊全。
簡單總結報告，環境非常好（唔係主打旅行團嘅Shopping Mall)，行起上嚟好舒服。熱門牌子嘅價錢比起香港嘅低少少，部分貨品可以貼近歐美outlet嘅價錢，不過目前只開放左第一期，大概行2-3個鐘左右就行晒，第二期聽聞年底會開，到時應該更多店舖可以掃貨，相對起林口另一間，華泰無咁似Shopping mall特賣場，Grand少少；適合做已經去過台灣多次，返香港前順便shopping 掃下平貨嘅新節目～
