去東京旅行，想係食玩住各方面都方便嘅話，住喺新宿區係個唔錯嘅選擇。今次我地就揀咗三間鄰近新宿中心幾個鐵路站嘅酒店，同大家分享返住宿體驗。

 

1. 東京新宿格蘭貝爾酒店 (Shinjuku Granbell Hotel Tokyo)

地址：東京都新宿區2-14-5

呢間酒店喺2013年開業，標準雙人房每晚$942起。

【房間：8/10】

今次住嘅房間同層仲有餐廳，但好彩隔音做得非常好，而且客房區同餐廳有一門之隔，想到客房區需要先拍卡，保安做得好好。始終酒店比較新，房間企理舒適，洗手間嘅設備同埋冷氣調節呢啲小設備都好新淨，房間大小偏細，但尚可接受。由於今次住嘅樓層較高，所以景觀開揚，坐喺窗邊嘅小梳化真係夠晒relax！另外房間仲提供埋一個藍芽小喇叭，對鍾意聽歌嘅朋友嚟講真係非常之貼心！

【設施：8/10】

以東京嚟講呢間酒店設施算係唔錯。酒店嘅公共空間都係經過精心設計，大堂同埋露天花園有唔少位置畀住客休息，氣氛都幾清閒。酒店地面、上層設有餐廳同BAR，而地下都有幾部自動販賣機，野食款式都幾多。

【位置：7/10】

酒店位於歌舞伎町北面嘅邊緣，要行遠少少先會搵到餐廳同便利店，但換嚟嘅係寧靜嘅環境。交通方面，行大約3分鐘就可以去到東新宿站(大江戶線、副都心線)，但如果想坐JR山手線或者其他線嘅話，就要行十幾分鐘去返新宿車站啦。

 

2. 新宿王子酒店(Shinjuku Prince Hotel)

地址：東京都新宿區歌舞伎町1-30-1

呢間酒店就喺新宿站附近，超方便！雙人房每晚$810起。

【房間：7/10】

酒店喺七十年代開業，不過近年都有翻新過，除咗浴室睇落有少少舊之外，房間整體設施都幾新淨，但係大小就一般啦，兩個人坐會覺得有少少逼。酒店其中一個好大嘅賣點係附近冇乜高度相若嘅建築，所以基本上大部份房間都有市內景觀 ，影相一流呀！

【設施：5/10】

酒店每一層都有自動販賣機，但就無咩公共空間。

【位置：9/10】

酒店位於歌舞伎町南面邊緣，係正熱鬧地段，附近有齊食店、便利店同商場，酒店地面有通道直達西武新宿站(西武鐵道新宿線)，而行去新宿車站則只需三分鐘，真係超級方便！

 

3. 門屋酒店(Kadoya Hotel)

地址：東京都新宿區1-23-1

東京酒店房間出名細，但如果想空間多啲但又唔想住得太貴嘅話可以考慮呢間酒店，雙人房價錢大約係$810起，離新宿區幾個鐵路站都幾近。

【房間：7/10】

酒店客房以東京嘅標準嚟講算係幾大，開晒兩個箧都仲有好多位行。不過房間就唔算太新淨，周圍都可以搵到歲月嘅痕跡，而且枕頭比較舊，訓落唔係咁舒服。另外，房間嘅窗係可以完全打開，陣陣涼風吹入嚟都幾舒服！

【設施：4/10】

自動販賣機同洗衣機係同一層，但個度嘅環境就有啲舊。

【位置：8/10】

由於酒店鄰近寫字樓區，入夜後附近環境會冇咁雜同嘈，亦都幾整潔。酒店距離新宿車站、都廳前站(大江戶線)同新線新宿站(都營地下鐵新宿線、京王新線)三個站大約五分鐘路程，鄰近嘅商店都幾多，行過一條行就有唔少食店同藥妝店，出去玩食野買野都幾方便。

－－－－－－－－－－－－－－－－－－－－－－－－－

另外提提大家，新宿酒店都幾搶手，而且旺季淡季價錢有別。提早少少預訂，就可以搵到最抵嘅價錢啦！

酒店網優惠代碼整合：http://www.meethk.com/?cat=4