好多人去越南峴港主要都係想度假同埋去沙灘relax一下，不過其實酒店選擇都幾多。小編今次去峴港同會安就住咗喺以下三間酒店，大家決定book酒店之前可以參考吓我地嘅住宿體驗。
1. 會安棕櫚花園海灘水療度假酒店 Palm Garden Beach Resort & Spa
地址：Lac Long Quan Road, Cua Dai, Hoi An, Vietnam
呢個五星級度假村好適合想去玩水度假嘅人，連自助早餐雙人房每晚大約$834起。
【房間：8/10】
小編今次入住嘅房型係雙床房，房間空間超大，完全冇壓迫感，入住感覺超relaxing。床嘅size都幾大，訓落好舒服。而浴室空間亦都好大，有提供企缸同浴缸。不過房間提供嘅插頭唔係幾足夠，而且冷氣偏暖，喺30幾度嘅炎炎夏日感覺有少少熱。
【設施：8/10】
度假村雖然位於郊區，但係有好多唔同嘅設施，例如餐廳同bar，可以靜靜地留喺度度假。另外值得一提嘅係，度假村就位於海灘旁邊，不過佢自己本身都設有泳池，方便大家唔同需要。
【位置：6/10】
呢間度假村位置並唔係喺市中心，不過如果call車去附近景點都幾方便，去會安古城大約10分鐘車程，而去五行山就大約20分鐘。而如果想去沙灘玩水，酒店隔黎就有啦，真係幾正！
2. 峴港巴拿山法國鄉村美居酒店 Mercure Danang French Village Bana Hills Hotel
地址：An Son, Hoa Son Commune, Hoa Vang District, Da Nang, Vietnam
呢間酒店位於巴拿山，連自助早餐雙人房每晚$303起，不過注意返，上山纜車+入場費(約$125)仲有call車到纜車站嘅錢都未計算在內，所以其實加加埋埋洗費同住喺市中心酒店差唔多，唔係話特別抵。
【房間：8/10】
今次入住嘅係雙人房，房間裝修好有童話入面古堡嘅味道，而且窗外咁啱就望到法國村嘅內街，氣氛好正！房間空間都幾大，玩完一日喺度hea吓都覺得好舒服。另外，值得一讚嘅係房間嘅插頭數量都幾多！
【設施：8/10】
巴拿山法國村位於山上，有纜車連接，可以好輕鬆咁上下山之餘，沿途仲可以欣賞自然風景。另外，法國村本身有唔少娛樂設施，例如室內泳池、室內遊樂場同蠟像館等等，更加有超特別嘅手動過山車，亦有好多唔同嘅餐廳。不過大部份娛樂設施都係下晝5點鐘開始就閂，入夜之後除咗影相同食嘢之外，基本上唔係太多嘢可以做。
【位置：4/10】
巴拿山位置有少少偏僻，上山落山一定要坐纜車，早尾班車約係朝早7點同夜晚8點，而且峴港市中心同山下嘅纜車站大約要45分鐘至1個鐘，想出去玩並唔係太方便。除非唔會去太多其他景點，純度假，否則只建議住一或兩晚。
3. 峴港假日渡假飯店 Holiday Beach Danang Hotel & Resort
地址：300 Vo Nguyen Giap Street, My An Ward, Ngu Hanh Son District, Phuoc My, Da Nang, Vietnam
呢間酒店喺峴港市內，酒店前面就係沙灘，連自助早餐雙人房$660起。
【房間：6/10】
今次入住嘅雙床房空間偏細。房間入面嘅洗手盆、浴室同廁所係分開，可以方便兩個人同時使用，不過設計都有唔少漏洞，例如浴室入面同門都冇位俾大家掛衫同埋洗手盆水龍頭設計唔太方便刷牙洗面等等，而且浴室同廁所都係用磨沙玻璃，大家應該因應返個人情況考慮適唔適合自己啦！
【設施：8/10】
酒店本身有bar同天台泳池等等嘅設施，酒店前面設有地下通道，等住客可以唔洗過馬路都去到馬路另一邊嘅沙灘，非常貼心。地下通道入面仲有小商店、俾小朋友玩嘅小型遊樂場等等，不過就有少少冷清。另外，酒店旁邊設有Spa同桑拿，住客可以以優惠價錢享用服務。
【位置：7/10】
酒店就位於沙灘前，有唔少水上活動可以玩。酒店位置未算最接近市中心，但附近幾條街都有唔少餐廳、咖啡店同便利商店。而由酒店call車到峴港市內其他地方都幾方便，大約15至30分鐘車程就可以去到各大景點。
－－－－－－－－－－－－－－－－－－－－－－－－－
今次嘅分享都係根據小編嘅個人住宿體驗分享，大家選擇酒店時，可以多參考過往嘅住客評論，比較唔同酒店網站，同埋善用酒店優惠碼啊！
酒店網優惠代碼整合：http://www.meethk.com/?cat=4
