東京市內比較傳統嘅台東區包括左淺草同上野，無論買野食野，定係觀光都非常方便！今次我地會介紹返三間台東區特色住宿，一齊體驗一下東京繁華嘅另一面啦！
1. 上野御徒町多米酒店 (Dormy Inn Ueno Okachimachi)
地址：東京都台東區6-7-22
酒店開業大概兩年，房間空間算大，除左有浴場亦有提供唔少貼心設備，雙人房每晚大約係$731起。
【房間：7/10】
一入房間就會見到放係廁所同浴室出面嘅洗手盆，而睡間同洗手盆中間亦設有躺門，所以間格上係比較特別。房間設備都幾新，例如係房間嘅大燈係可以調較光度同埋色溫，床邊亦有萬用手機充電器。不過酒店附近就有一條高架嘅公路，而今次所住嘅房間窗戶又正正對住公路，所以夜晚都有少少嘈。
【設施：9/10】
酒店最大賣點係有個免費日式大浴場俾大家浸浴，裡面仲設有露天溫泉同埋桑拿添！不過就比較細，想浸又驚多人嘅可以晚飯時間黎睇下。另外酒店仲有唔少貼心設備，好似每層出面都放置左燙衫工具，浴場設有免費洗衣機，每晚仲有小碗拉麵宵夜可以免費享用！
【位置：8/10】
行去上野站或御徒町站都唔使5分鐘！行去阿美橫丁更加只需1分鐘！
2. 根津影像飯店 (Hotel Graphy Nezu)
地址：東京都台東區4-5-10
呢間飯店唔算太方便，但價錢好平，冇浴室嘅雙人房每晚大約$500起，連浴室就最平$650起。
【房間：6/10】
小編今次入住嘅係冇浴室嘅房型，需要用共用浴室。房間空間都算係幾大，有提供基本設施，但房入面冇洗手盆就唔係太方便啦，洗面刷牙都要出房。不過以呢個價錢嚟講，都算係合理。如果想要獨立浴室，俾多百幾蚊就有，不過連浴室嘅房型會比較搶手，大家記住提早book定呀！
【設施：7/10】
呢間飯店嘅格局比較似hostel，當中唔少空間係俾機會旅客認識新朋友，例如地面嘅cafe、天台空間、common area同共用廚房，設施好新淨，夜晚可以同朋友一齊煮吓嘢食、吹吓水。至於小編住果層嘅共用浴室都算係幾乾淨，浴室分三格，夜晚唔算多人用，但只有一格廁所，有時都要等幾耐吓。
【位置：4/10】
飯店位於根津車站附近，但距離連接JR山手線嘅上野站就大概要行10分鐘路，位置有少少偏遠，拖行李行唔算好方便。不過飯店附近就係民居，夜晚幾安靜，都幾適合鐘意清靜環境嘅朋友。
3. 淺草旅籠飯店 (Asakusa Hotel Hatago)
地址：東京都台東區2-6-8
想體驗一下日式旅館，可以考慮呢間距離淺草雷門都幾近嘅酒店！酒店喺2012年開業，雙人房每晚大約600蚊起，包早餐。
【房間：5/10】
房間採用咗榻榻米作為地板，啱晒想試吓日式風格房間嘅朋友！房間有齊基本設備，不過房間就真係比較細喇，開晒兩個篋會無咩位行，雙人床兩個人瞓會有少少逼。
【設施：7/10】
酒店最大特色係頂樓設有免費觀景台，係可以望到Skytree添架！觀景台你早上開放，如需其他時間上去就要去前台拎鎖鑰。酒店所包嘅早餐每日有兩款可以揀，份量都幾足夠架。用餐區設係觀景台下一層，所以食早餐時都可以望到河邊風景。但要留意離開酒店需要交還房間鎖鑰，酒店亦唔受非住客到訪。
【位置：7/10】
酒店附近比較寧靜，但距離淺草雷門就只需要5分鐘步程！離淺草站更加只係100米左右，觀光同交通都幾方便。
－－－－－－－－－－－－－－－－－－－－－－－－－
今次嘅分享都係根據小編嘅個人住宿體驗分享，大家選擇酒店時，可以多參考過往嘅住客評論，比較唔同酒店網站，同埋善用酒店優惠碼啊！
酒店網優惠代碼整合：http://www.meethk.com/?cat=4