由東京出發，喺淺草坐2個鐘嘅特急火車，大家知唔知會去邊到呢？
今次小編帶你用各式周遊券走訪鮮為人知嘅日本神秘境地！
第一站我哋嚟到日光！係哩2小時嘅車程內首先迎接大家嘅係大自然嘅懷抱，以及日光獨有嘅仙氣～
點解咁講？由於日光得天獨厚嘅地理位置，由鎌倉時代已經因為祭祀日光三山嘅山神而著名，鬼怒川溫泉擁「東京的奧屋敷」嘅美名，加上當時難得一見嘅西式酒店，令日光喺明治時代成為日本最早期嘅海外遊客觀光地，當中世界遺產「二社一寺」更加係日光初心者必遊之地。
紀念名將之地
世界遺產「日光的社寺」當中包括咗日光山內共103楝建築，以日光東照宮、日光輪王寺及日光二荒山神社嘅「二社一寺」為核心，亦係日光王道行程之選。當中，日光東照宮乃祭祀德川家康嘅神社，現存嘅社殿群幾乎全部係為德川第三代將軍家光於1636年建造，極具歷史價值架！
即使對日本史唔熟悉都唔緊要！到訪東照宮嘅時候，都可以由境內各處嘅雕刻中搵到樂趣架！全境共有5,173尊雕塑，可見當時木匠嘅精巧手工。最深入民心一定係神厩舍上「非禮勿視、非禮勿聽、非禮勿言」嘅三猿，唔單止係日光東照宮嘅代表，仲化身成御守造型添呀！
日光東照宮最有睇頭嘅，係經歷平成大修理後重拾光彩、金光閃閃嘅陽明門。哩個高11米嘅樓門上一共刻咗508個雕像，上面不乏表現與中國共通嘅民間名人、習俗同傳說，例如福祿壽、七福神、鐵拐李及鍾離權等八仙及琴棋書畫等，極多色彩且極detail嘅雕刻～甚至有古人認為睇一天都唔會厭呀！所以就有「日暮御門」嘅稱號啦！
即使已經多次到訪，小編都仲係會為陽明門嘅宏偉而驚歎呀！而且每次都可以係境內雕塑中發現新故事，的確係百去不厭嘅世界遺產！
日光東照宮
地址：栃木県日光市山内2301
拜會姻緣大神
二荒山神社以現名「男體山」嘅二荒山為神體，祭祀著一家三口嘅「二荒山大神」，包括代表男體山、招福結緣嘅爸爸「大己貴命」，代表女峰山嘅媽媽「田心姬命」以及兩人之子「太郎山」嘅「味耜高產根命」。當中大己貴命又名大國主命，心水清嘅朋友應該一睇就知道係同最強戀愛神社出雲大社為同一祭神。
建於東照宮西邊嘅二荒山神社，本社位於日光社寺嘅最深處，另有位於中禪寺湖畔嘅中宮祠同男體山山頂嘅奧宮，連日光山入口嘅朱色神橋亦屬二荒山神社嘅一部分架！哩到佔地廣達3,400公頃，面積僅次於三重縣嘅伊勢神宮！二荒山神社亦係二社一寺中歷史最悠久嘅建築，相傳從766年由僧人勝道上人所建～
日光二荒山神社
地址：栃木県日光市山内2307
三尊佛像的氣勢
輪王寺嘅名氣雖然不及東照宮及二荒山神社，但歷史亦由奈良時代嘅山岳信仰開始。三佛堂係日光山中最大規模嘅木造建築，供奉著代表日光三山嘅千手觀音(男體山)、阿彌陀如來佛(女峰山)及馬頭觀音(太郎山)，將日光山「山、神、佛」為一體嘅信仰形象化。
同二荒山神社一樣，輪王寺嘅所屬建築分散喺日光山內，包括祭祀德川家光嘅大猷院、奉有立木觀音嘅中禪寺等，各有睇頭。當中溫泉寺係由勝道上人發現嘅溫泉，係全日本難得一見嘅可以浸溫泉嘅寺廟，到奧日光個陣一定要去試下啦！
輪王寺
地址：栃木県日光市山内2300
日光交通資訊
睇完介紹，想知點樣去？就等小編話你知！
由東武淺草站乘搭特急電車至東武日光站，車程約2小時。
海外旅客仲可以喺東武淺草站旅客中心購買「
一票包括淺草至日光來回車票 (憑周遊券特急收費可享8折優惠)、鐵道及巴士指定區間車票(廣域券包括免費乘坐空中纜車及遊覽船)，兼享指定淺草嘅手信店及日光地區嘅遊樂設施嘅折扣優惠架！