Club Med Sahoro
近年越嚟越多人選擇到北海道度假兼滑雪，今次小編試玩新裝修咗、坐落於北海道嘅 Club Med Sahoro，一齊睇吓有咩玩啦！
住喺Club Med Sahoro，一個價錢就已經包好曬每日嘅衣食住行，唔洗擔心安排行程，可以真正咁享受假期~
滑雪體驗
【Gondola Station佐幌滑雪場】
冬天嚟到北海道，唔係唔滑雪嘛？度假村有免費穿梭巴士直達Gondola Station佐幌滑雪場，班次唔算多，但亦可步行約15分鐘前往。入住Club Med會包咗滑雪場Ski Pass，可無限次乘搭纜車及吊椅！
巴士班次可提前喺Reception睇到〜
呢座雪山有成21條唔同階級嘅滑雪道，但斜度都有返咁上下，建議有學過滑雪先上去！呢度人流唔算多，識滑雪嘅朋友就可以盡情咁滑雪啦！
滑雪道分為三個等級：7條黑色滑雪道(高級)、5條紅色滑雪道(中級)、9條綠色滑雪道(初級)
另外，佐幌滑雪場有纜車可以上落山頂，只要持有Ski Pass (包括在Club Med入住費用內) 就可以無限次乘搭！
【Club Med 免費單板、雙板滑雪課程】
唔識滑雪或者初學都唔洗咁愁，因為住客可以每日參加呢度嘅免費單板、雙板滑雪課程，你可以根據返自己嘅程度去上堂，每一節都有大約兩小時，而且每堂人數最多12人，會有1-2位教練用英文教授，所以都唔洗太擔心上堂人數太多嘅問題〜
通常新手學滑雪都冇完整裝備又或者唔想帶太多野嘅你，呢度就可以加錢租借雪具、雪衣、雪褲，Check out前先還都得，好方便！而且小編所見，主要都係用上法國品牌 Rossignol 嘅產品，亦非常新淨。
度假村餐廳
【主餐廳 DACHI 雪景自助餐】
呢度有2個主要用餐地方，主餐廳DACHI提供自助餐，主要為亞洲及西式美食，晚餐更會每日有唔同海鮮提供，好似係生蠔、燒龍蝦或者刺身！而且餐廳落地玻璃可以望住外面雪景食野，好嘆啊〜
帶小朋友嚟嘅家長都唔洗擔心，呢度嘅寶寶專區就可以方便父母為小朋友準備餐點。
【Mina Mina 日式火鍋】
另一間餐廳Mina Mina就主打地道日式火鍋，由於佢哋係同北海道當地農場合作，所以可以食到北海道新鮮食材，但食物選擇唔算多，肉類就只有海鮮(三文魚、蜆等)，想食牛、豬等肉類就要另加錢。
另外，想食呢間就記得要提早係早餐時段book定位。
【Wakka 酒吧】
小編最鐘意就係呢度嘅酒吧 – Wakka，唔單只環境舒適，呢度全日(早上10點到晚上12點)都會供應唔少種類嘅紅白酒、Cocktail 同日本酒，小朋友都有唔少非酒精類飲品選擇！
全日活動
食完晚餐仲可以Join佢哋嘅Party同G.O.表演，大人、小朋友都啱玩！有好多小朋友會跟埋家長一齊玩同跳舞，氣氛超開心啊！
滑完雪，仲有咩玩？住客可以玩埋佢哋嘅室內AR互動攀石、嘆吓戶外加拿大浴、溫水泳池等等，真係有排玩啊！
而且全日都有唔同活動可以參加！平時有學開瑜伽嘅小編仲玩埋呢度嘅瑜伽班，由朝玩到晚都真係唔成問題！
兒童俱樂部
呢度嘅兒童俱樂部分咗唔同年齡組別，會有專人帶小朋友去參加唔同活動，家長就可以放心自己去玩吓或者休息吓啦！
雪景住宿
呢度嘅住宿位置於雪山腳下，房間全新設計，充滿北海道原住民特色。一打開窗簾就見到好靚嘅雪景，真係令人好放鬆！
機票＋住宿套票組合
Club Med Sahoro離新千歲機場大概120分鐘車程，如果購買包括機票嘅套票組合，就會包埋專車接送來往機場同度假村。
預訂呢類型一價全包嘅度假村可以慳返唔少時間準備行程，無論一家人定係幾個朋友一齊嚟，都一定係一個非常好既回憶同旅遊體驗！
Club Med Sahoro
地址：KARIKACHI KOGEN SHINTOKU-CHO
KAMIKAWA-GUN – HOKKAIDO
081 0039
Hokkaido Japan
官網：https://meethk.net/2EMuEaS